Тӧв шӧр 13-ӧд лунӧ Кулӧмдінын кыпыда муніс ӧнія кадся коми сьыланкывлӧн «Василей» фестиваль. Таво ассьыс юбилейсӧ пасйӧ оз сӧмын тайӧ лоӧмторйыс, но и сылӧн «батьяс» пиысь ӧти. Нималана композитор Василий Чувьюровлы тырис 80 арӧс. Казьтыштам, мый тавося «Василей» нуӧдісны кыкысь: 3 час лунсянь – кулӧмдінсаяслы, а 6 час рытсянь – республикаса мукӧд кар-районысь воӧмалы, культураын зільысьяслы да регионса чина йӧзлы.

Фото Виктора Бобыря

Концерт восьтігӧн регионса Юралысь Сергей Гапликов шуис: 2018-ӧд во лоӧ Культура воӧн. Водзджык татшӧм вӧзйӧмӧн губернатор дорӧ шыӧдчисны культураын уджалысьяс, и сійӧ донъялiс тайӧ мӧвпсӧ.

– Конкурсыс важӧн нин воис сьӧлӧм вылӧ эз сӧмын сиктса йӧзлы, но и лоис республикаса традицияӧн. Тані юргӧны быдсяма сьыланкывъяс, кӧні эм чужан му, бать-мам дорӧ муслун, пыдди пуктӧм да ошкӧм, – пасйис Сергей Гапликов.

Юралысь сетіс чолӧмалана адрес Василий Чувьюровлы да аттьӧаліс письмӧясӧн «Василей» котыртӧмӧ ыджыд пай пуктысьясӧс. Тайӧ – районса администрацияын уджалысьяс Наталья Левченко да Надежда Русинова, Керчомья сикт овмӧдчӧминӧн веськӧдлысь Нина Лодыгина да республикаса нимйӧза артистка Лидия Логинова.

Колӧ пасйыны, мый конкурсын вӧлі 4 номинация. Петкӧдчӧмъяс костын видзӧдысьясӧс гажӧдісны тешкодь интермедияясӧн. Залын пукалысьяс весалісны символическӧй черань вез (сыкӧд тшӧтш и став лёксӧ) да ворсісны лым ёкмыльясӧн.

Таво ордйысисны 14 сьыланкыв. Быд номинацияын («Чужан му йылысь сьыланкыв», «Радейтчӧм йылысь сьыланкыв», «Национальнӧй эстрада сьыланкыв» да «Шмонитана сьыланкыв») вӧлі мый видзӧдны да мый кывзыны. Республикаса енбиа сьылысьяс да быдса котыръяс ёна воисны сьӧлӧм вылӧ чукӧртчысьяслы.

Концертлӧн мӧд юкӧнын водзӧ нимӧдісны Василий Чувьюровӧс. 80 арӧса юбилей пасйысьӧс чолӧмалісны рӧдвужыс да ёртъясыс.

Вермысьясӧс тӧдмавтӧдз видзӧдысьяслы сюри нӧшта ӧти козин – «Асъя кыа» сьылан да йӧктан ансамбль петкӧдліс «Уна рӧма войвыв» программаысь юкӧн.

Дерт, медся тӧдчана да кыпыд здукъяс — тайӧ кывкӧртӧд да вермысьясӧс чолӧмалӧм. «Радейтчӧм йылысь» номинацияын медбурӧн лоис «Югыд войяс» сьыланкыв, кодӧс сьыліс Искусствояс колледжысь «Коми сьылан» котыр. Кывъяссӧ гижис Зоя Шиликова, шыладсӧ – Алексей Ген.

«Шмонитана сьыланкыв» номинацияын медводдза места босьтіс «Тулыс» котыр (сьыланкывйыслӧн шыладыс Михаил Шаховлӧн, кывъясыс – Анжелика Елфимовалӧн). Вермысьӧс чолӧмаліс «Мегафон» компаниялӧн PR-менеджер Светлана Иевлева. Виктор Савин нима театрысь «Тагъя сур» ансамбль ёна гажӧдіс тайӧ сьыланкывйӧн став чукӧртчысьӧс.

«Коми войтыр» ӧтмунӧмӧн юрнуӧдысь Алексей Габовлы уси шуд индыны «Чужан му йылысь» номинацияын вермысьӧс. Сэні медбурнас лои буретш Кулӧмдінысь «Июль» сьылан котыр, коді петкӧдчис «Тӧв шӧр сьыланкывйӧн» (шыладыс Василий Гущинлӧн, кывъясыс Надежда Груздевалӧн). Сідзжӧ Алексей Габов козьналіс Кулӧмдін районса администрацияӧн веськӧдлысь Сергей Рубанлы коми серӧн мичмӧдӧм шарп да шапка.

«Национальнӧй эстрада» номинацияын медвылыс тшупӧдӧ кайис Максим Уляшёв «Прӧстӧй сьыланкыв» композицияӧн. Шыладсӧ гижис ачыс сьылысь, а кывъяссӧ – Евгений Козлов. Чолӧмаліс енбиа мортӧс национальнӧй политика министр Галина Габушева.

Кулӧмдін районса администрацияӧн веськӧдлысь Сергей Рубан ассьыс призсӧ сетіс Сыктывкарысь Анна Ульяновалы, коді сьыліс аслас шылад улӧ да Василий Лодыгинлӧн кывъяс вылӧ лӧсьӧдӧм «Еджыд муын еджыд вӧвъяс» сьыланкыв.

Каналан Сӧветӧ пырысь Татьяна Саладинасянь Василий Чувьюровлы вичмис шоныд эшкын.

Федерация Сӧветӧ пырысь Дмитрий Шатохин козьналіс 25 арӧса «Василейлы» «гӧтырпуӧс» – Василина нима аканьӧс. Сійӧс сетісны Сергей Рубанлы. Комиысь сенатор да районса администрацияӧн вӧвлӧм веськӧдлысь сідзжӧ вӧзйис восьтыны Кулӧмдінын «Василейлы» сиӧм музей.

Комиысь мӧд сенатор Валерий Марков чолӧмаліс Василий Чувьюровӧс да козьналіс сылы телевизор.

Коймӧд, мӧд да медводдза места босьтысьӧс индіс культура, туризм да архивнӧй делӧ министр Сергей Емельянов. Сійӧ эз кӧсйы дыр сёрнитны, сӧмын висьталіс чукӧртчысьяслы бур юӧр:

– Ме шуа, мый Кулӧмдін районса медшӧр «бренд», татчӧс да став республикаын олысьяслӧн медрадейтана «Василей» фестиваль пыр кутасны юргыны Кулӧмдінын и сӧмын тані.

Коймӧд места вичмис Ксения Мишариналӧн «Нылӧ» сьыланкывлы, кодӧс енбиа том ань сиис ичӧт нылыслы. Мӧд места босьтіс шмонитана «Висьтасьӧм» сьыланкыв (кывъясыс да шыладыс Лидия Логиновалӧн). Сцена вылын сьыліс Александр Кузнецов. Но а медвылыс тшупӧдӧдз воис Михаил Оверинлӧн да Геннадий Юшковлӧн «Шондібан» сьыланкыв. Сійӧс сьыліс Сыктывдін районса Выльгортысь «Радлун» ансамбль.

Залын чукӧртчысьяс тшӧтш торйӧн пасйисны Ксения Мишариналысь сьӧлӧм нормӧдана сьыланкывсӧ. И сылы вичмис видзӧдысьяссянь козин. Енбиа авторӧс чолӧмалісны Госсӧветса депутат Владимир Косов да йӧзӧс велӧдан, наука да том йӧз политика министр Наталья Михальченкова.

Гран-при босьтысьлысь нимсӧ висьталіс Каналан Сӧветӧн веськӧдлысь Надежда Дорофеева.

– Ме кӧсъя шуны ыджыд аттьӧ ставныслы, коді вӧчис тайӧ ыджыд гажсӧ. Гӧгӧрвоа, мыйта вын вӧлі пуктӧма да узьтӧм вой кольӧма, медым ми аддзим коми сьыланкывлысь став мичлунсӧ. Тайӧ зэв тӧдчана удж чужан кыв сӧвмӧдӧм могысь, – пасйис республикаса парламентӧн юрнуӧдысь.

Тавося «Василейлӧн» медшӧр козиныс вичмис «Чужан грездӧй» сьыланкывлы. Шыладсӧ гижис Сергей Кузьмичёв, кывъяссӧ – Ольга Рогожникова. «Рассвет» ансамбль, коді петкӧдліс тайӧ сьыланкывсӧ, чуймӧдіс видзӧдысьясӧс весиг саксофонӧн ворсӧмӧн.

Концерт помын «Коми евровидениелӧн» гӧсьтъяс окотапырысь видзӧдісны медбур номеръяссӧ нӧшта ӧтчыдысь.

***

Репортажи БНК с фестиваля «Василей» на русском языке:

В Усть-Куломе стартовало «Коми евровидение»

Сергей Гапликов объявил 2018-й Годом культуры в Коми

На «Василее» отметили два юбилея

Гран-при «Василея» достался сыктывкарскому композитору Сергею Кузьмичёву